Burkina Faso : Urgent, le message du Capitaine Ibrahim TRAORÉ traduit en langue nationale Moore

YƲƲM-PAALLÃ KOEESE
(Waogdgo, yʋʋmd 2023 yʋʋm-sar kiuug rasem 31 daare)

Burkĩna Faso nin-buiidu,
M tʋmd-n-taas sẽn zabd n baood tɩ bãan ne soog-m-meng sɩd-sɩd zĩnd tõnd tẽngã ;

Yaa ne waoor la sũ-noog ne maam, tɩ m dɩk koɛɛgã 2024 yʋʋm-paallã sẽn sɩngdã, n kos Wẽnnaam tɩ yʋʋmdã yɩ sõmbo, n yɩ sũ-noog yʋʋmd n kõ Burkĩna nin-buiid sẽn be tẽn-torã pʋg la sẽn be tẽn-taase, d zo-rãmb la d tʋmd-n-taase.
D pʋʋs Wẽnnaam barka, b sẽn kɩt tɩ d ta rũndã daarã sẽn yaa yʋʋmd 2023 wã sɛɛb raarã. D kos Wẽnnaam yaafa n kõ neb nins fãa sẽn koos b yõyã tẽngã lebg-n-deeg zabrã pʋg tɩ yaa Burkĩna Faso na paam a soog-m-mengã ; Wẽnd na maneg b reng-taoore.
D le kota Wẽnd t’a kõ neb nins fãa sẽn paam sãmpoag tɩ yaa zab ne nin-wẽnsã sababã laafɩ.
D pẽgr la d teelg bee ne neb nins fãa sẽn zoe n bas b tẽms n lebg zoɛtb rũndã-rũndã wã.

M zo-rãmba ;
Yʋʋmd 2023 wã pʋgẽ, d maana vaees-n-gɛsg sẽn ya zulung Burkĩna Faso sẽn vɩ yɛl nins pʋgã zugu. Yaa yʋʋmd tõnd sẽn dɩk n na n bao n bãng zu-loees nins sẽn gĩd Burkĩna Faso wã ; rẽ kɩtame, tɩ d dɩk noy sẽn tar yõodo. No-rɩkds bãmb yaa sẽn na yɩl n kao yemdã, nansaa-wẽnsã ne tẽn-yãmbdbã pipi bãn-sogdsã. Bala b yeelame tɩ « wagdr sã n zuk f bũmb la a lebg n sõngdf n gẽesdẽ, bõn-kãng yãab yaa toogo ».
Yʋʋmd 2023 wã yɩɩ tʋʋm-paal siglg yʋʋmde. Yʋʋm-sar kiuug rasem 11 wã daar sẽn loogã, d kʋmbame n wilg tʋʋm-paal d sẽn siglg sʋdaarã tʋʋm wɛɛngẽ, laafɩ wã ne paam rɩɩb tɩ sekã wɛɛngẽ ; tʋʋm-paal wʋsg paama tɩʋʋsgo, sẽn kẽed ne yidgr la lozĩn-dãmb luglg wɛɛngẽ. M dat n bẽda ka n pʋʋs Burkinabɛ-rãmbã fãa ne b sẽn nidgd pãng ba ne tẽngã zu-loees sẽn ya wʋsgã, b sẽn bãng zabr ning d sẽn zabd tɩ yaa na tõog n fãag tẽngã, n paam soog-m-meng sɩd-sɩdã võorã.
Yʋʋmd 2024 wã yaa yʋʋmd ning pʋg d sẽn na n kell n kẽng ne d maoorã taoore. N na n kell n kẽnga taoor ne yemdã la tẽn-yãmbgã sẽn kɩt tɩ sũ-noog ka wã bãn-sogdsã kaoobo.

Yʋʋmd 2024 kãngã pʋgã, tõnd na n kell n kẽnga taoor ne nidg pãng n zab n deeg d tẽnga. Yaa rẽ n kɩt tɩ sẽn kẽed ne sʋdaarã tʋʋm wɛɛngẽ, d na n yãa pipi birgaadã d sẽn pʋd tɩ « Birgaad ɛspesɩyallã dẽntɛrvãnsõ rapɩɩdã » sẽn yaa « batayõ dẽntɛrvãnsõ rapɩɩd-dãmb buud toor-toore », « grupma de fors ɛspesɩyalle », ne « gurpma ɛspesɩfɩke ».
Tʋʋm-kãng yaa sẽn kẽed ne tõnd sʋdaarã tʋʋm maneg n siglg wɛɛngẽ, sʋdaas sul rɩk n toeem zĩis sẽn na yɩl tɩ b tõog n tʋm tɩ bãanã wa. Yʋʋmd 2023 wã pʋgẽ zab-teedã baoob rabay tʋʋmgãnegdg ne sʋdaarã tʋʋm maneg n siglg tʋʋm-gãnegdg la b maan-yã. 2024 yʋʋmdã pʋg la tʋʋmgãnegdɩ bãmb tʋʋm na n paam pidsgu, sẽn na n yɩ koglg teed sẽn ya zɩsd n tar pãnga, sẽn na n paas sʋdaasã sul sẽn be zabrã yãoogẽ wã pãnga. Sẽn paas tʋʋm-kãnga, ya y bãng tɩ 2024 yʋʋmdã na n yɩɩ tʋʋm-bɛd yʋʋmd tɩ bala tõnd luglga tʋlsem dãmb sẽn kẽed ne zab n deeg d tẽngã ne zoɛtbã (PEDEYI-rãmbã) na leb b zĩizẽ la b na paam koglgã wɛɛngẽ
Yʋʋmd 2023 sẽn loogã pʋgẽ, m da zoe n wilgame, tɩ yam-yãkr sẽn kẽed ne tʋʋm wʋsg maaneg sɩngame. Tɩ yʋʋmd 2024 sẽn wat woto wã, tõnd segd n maneg n tagsame tɩ pidi, n yaool n maan tʋʋm nins fãa d sẽn da sɩngã, sẽn yɩɩd fãa perzɩdã wã yam-yãk-sõng ning sẽn kẽed ne rɩɩb wɛɛngẽ men-sekre , n le paas tʋʋm-bɛd yɛs maaneg koobã la gʋʋlgã ministɛɛr sẽn na siglg yaoolma. Yam-yãk-kãensã pʋgẽ, sɩpaolg koobã tʋʋm lagma be, sẽn na yɩlẽ tɩ ba d ka tõog n paam rɩɩb wɛɛngẽ men-sekrã zãng-zãng me, bɩ d kolg-d weoogo.
Ad-y yaa maoor meng-menga, tɩ m boond Burkina nin-buiidã tɩ b rɩk yam-yãk-kãensã t’a yɩ b mens yam-yãkre, tɩ ned fãa sẽn beẽ bɩ a mao n yãag Leta wã tɩ d tõog n dok zu-loe-kangã. Yam la rabaar buud wʋsg na n dɩkame, sẽn kẽed ne lozind-rãmb tʋʋm wɛɛngẽ, la bũmd ning fãa sẽn tõe n sõng d lɛɛbdb nins fãa sẽn maand b sẽn tõe ne sũ-keelem sẽn na yɩlẽ tɩ rɩɩb la bũm wʋsg ta Burkina tẽms toor-toore. Lapɛk luglgã zoe n yaa bũmb sẽn na sõng-d tɩ d paam n me lozinddãmb kẽere. Yam-yãkr wʋgs tʋʋm wɛɛngẽ na wata yɛs yʋʋm-kãngã pʋga.
Rõandã yʋʋmdã pʋgẽ, m na n yõka Burkĩna bɛembã fãa sɛɛg yɛsa, tɩ b tũ perzidã wã yam-yãkrã sẽn kẽed ne nin-buiidã yidgri, n maan b meng yam-yãkre. Laafɩ wã wɛɛngẽ, wala m sẽn da gomd yʋʋm-sar kiuug rasem 11 daarã, d vees n gesame, tɩ ya tɩlae tɩ d lebg n me d galen-tẽnsã la d yɩlg-ba. Rẽnd nin-buiidã dɩk yam-kãngã n maab-b rẽnd n sak n kẽes b toogo, n yɩlg zĩisã tɩ b neer yɩɩg pĩnda, tɩ bã-piuugdum nins d sẽn zĩnd rɩẽ wã ra le wa ye.
Tõnd sẽn be maoor ning zug wakat kãng wã, yaa tõnd sẽn yala la d rog-n-mikã maoore. Wa d sẽn zoe n mii, d sã n ges nasaar dãmbã tẽn-yãmbgã yiisa tõnd d rog-n-mikẽ wã; rog-n-mig-sõng ning sẽn da ya laafɩ, bãanem la sõng-taab rog-n-miki. Tõnd konga sẽn da ya bõn-yõod ne-do. Yaa rẽ yĩnga la tõnd dat tɩ d rog-mikã paam zĩig d maoorã pʋgẽ masã.
Yaa rẽ n so, tɩ buudã goam na n soog taoor masã, la sẽn tu ne laloa gãnegre, b lugla kõsɛy nasyonall dɛ kominote, tɩ trãzisẽo wã depit-rãmb sak tɩ rẽ na n yɩ. Woto yaa bũmb sẽn na n le lebs-do d yẽgrẽ, tɩ d le tõog puk bõn-yõod ning sẽn da paoog-dã, sẽn ya laafɩ, sugr la sõngtaaba.

Sẽn kẽed ne ninsaal yam-daabã wɛɛngẽ, a yɩɩ bũmb sẽn kell n tall pãng wʋsg 2023 yʋʋmdã. La rõandã yʋʋmdã d na n zaba ne-a d pãng tɛka. Yaa rẽ la m dat n bool tʋʋm-noy nins fãa sẽn zabd ne yel-kãngã tɩ b modg n paase, tɩ d naag taab n menes-a tõnd tẽngã ka.

M saam-biisi, pagb la raopa ;
Tõnd kɩsa sɩd ne sor ning tõnd sẽn dɩkã. Sor a to ka be, n le n yɩɩd-a, d soog-m-meng hakɩkã, la Burkĩna Faso na yidg la a kẽng taoor wɛɛngẽ ye. Tõnd tara sɩda, ne ninbuiidã sõngr tɩ tõnd sẽn maood maoor ningã yaa burkĩndlim maoor Burkĩna Faso yĩnga, LAYEYƐS la Afirik zãng fãa yĩnga.
M pʋʋsda yãmb ne y taabo, yʋʋm-paallã yĩnga ; Wẽnd na kɩt t’a yɩ laafɩ yʋʋmde, maoor yʋʋmde, n yɩ yʋʋmd Burkĩna Faso nebã fãa sẽn na n bao nonglem ne taaba, n bas welgrã tɩ lʋɩ, la b naag taab n ges beoog neerã ; a kell n yɩ sũ-noog yʋʋmde, la raab pidsg yʋʋmde.
M ka tõe n baas m goama, n ka pʋʋsd Burkĩna nin-buiidã sẽn wʋm maoorã võore, n sak kẽes b meng wĩndg la yʋng n maood n na gũ trãzisẽo wã ne nao-kẽndr toor-toore. D bãng vẽeneg tɩ bɛyã na ka sik a lok ye, bɩ d gũusi. Nasaar-wẽngã la bɛɛb sẽn be Burkĩna Faso ne kɛɛng ket n tʋmdame n dat wẽnga.
M pʋʋsa Burkina nin-buiidã bark b maoorã yĩnga ; m pʋʋsa neb nins sẽn be kaanẽ bɩ sẽn zarẽ, tɩ yaa Burkĩna Faso bɩ tẽn-taase, dũni wã fãa pʋgẽ n sak n teend tõndo, la b sõngd Burkĩna Faso, mao-kãngã pʋgẽ.

Wẽnd na kaoos Burkĩna Faso !
Wẽnd na gũ Burkĩna Faso !
Tõnd tẽngã yĩnga, d saka kũum, la d na tõoge.

Trãzisẽo wã taoor soaba

Kapitɛnd Ibrahim TRAORE

Laisser un commentaire